Et ass schmeier! Den Himmel dréckt an d’Loft ass fir ze schneiden. D'Vulle fléien déif, et ass bronkeg, dompeg.Et ass schmeier! Ass et de politeschen, de wirtschaftlechen oder den zwëschemënschleche Klima? Ass et de Klimawandel? Schwéier ze soen, mir wësse just, datt de Schweess eis zolitt ausgeet.
Et ass schmeier! D’Terrassen sinn eidel, d’Stroossen si fiicht, d’Leit hunn sech hannert hir déck Maueren zréckgezunn. D’Klimaanlage si voll opgedréit.
Et ass schmeier! Et läit een Donnerwieder an der Loft, jidderee spiert et. Mee wat gëtt dat fir ee Gerubbels? Aus wéi enger Richtung kënnt et ? Botzt et Loft oder rappt et eis all mat fort?

15. - 20.11.16 Free seating mat Kabaret Bestuhlung am Grousse Sall
23. - 26.11.16 Numeréiert Plazen am Grousse Sall

Texter Alain Adams, Roland Meyer Regie Roland Meyer Et spillen Conny Braquet, Irène Zeimes, Nico Dabé, Gilles Wunsch

Gutt geroden!
Fotosausstellung vum 17. - 30.11.16

Vernissage Donneschdeg 17.11.16 : 18:30

Zanter 15 Joer begleed de Claude „Sibi“ Sibenaler de Kabaret Sténkdéier als Fotograf bei alle Programmen. Hie mécht d'Pressefotoen, d'Livefotoen an d'Videoen. Dës Ausstellung weist, wéi et op an awer och hanner der Bühn bei de Sténkdéiere leeft: d'Haaptsaach ass a bleift den Humor. De Claude „Sibi“ Sibenaler fänkt dës ganz besonnesch Stëmmung a senge Fotoen an a presentéiert esou ee Stéck Lëtzebuerger Kabaretsgeschicht.